ऐरोली येथील राजमाता जिजाऊ महानगरपालिका रुग्णालयात गरोदर महिला सोनम डोंगरे आणि त्यांच्या बाळाच्या मृत्यूच्या घटनेची गंभीर दखल घेत महापौर सुजाता पाटील यांनी संबंधित डॉक्टर, अधिकारी आणि कर्मचाऱ्यांवर तात्काळ निलंबनाची प्रक्रिया सुरू करण्याचे निर्देश प्रशासनाला दिले आहेत.
चौकशी समितीचा अंतिम अहवाल येईपर्यंत ही कारवाई करण्यात येणार असल्याचे त्यांनी स्पष्ट केले.या प्रकरणातील दुसऱ्या गरोदर महिला रिचा मिश्रा यांची महापौरांनी वाशी येथील फोर्टिस रुग्णालयात जाऊन भेट घेतली.
रिचा मिश्रा आणि त्यांचे बाळ दोघांचीही प्रकृती स्थिर असून ते धोक्याबाहेर असल्याची माहिती यावेळी त्यांना डॉक्टरांकडून देण्यात आली.घटनेबाबत बोलताना महापौर सुजाता पाटील म्हणाल्या, “सोनम डोंगरे आणि त्यांच्या बाळाच्या निधनामुळे झालेल्या दुःखाची भरपाई कधीच होऊ शकत नाही.
मात्र, चौकशीत कोणतीही कसर ठेवली जाणार नाही. दोषींवर कठोर कारवाई करून डोंगरे कुटुंबाला निश्चितच न्याय मिळवून दिला जाईल.”यावेळी त्यांनी मनपा रुग्णालयांमधील आरोग्यसेवेबाबत कठोर भूमिका मांडत सांगितले, कि “महानगरपालिका रुग्णालये सर्वसामान्यांना जीवनदान देण्यासाठी आहेत, जीवाशी खेळण्यासाठी नाहीत. भविष्यात अशा प्रकारचा निष्काळजीपणा खपवून घेतला जाणार नाही.”
